اليوم باش نحكي على مماتي والا ياتي
مرا كبيرة زمنية شبابة برشا عظيمة وقوية
مماتي قعدتها ما ثماش، تبدى تعس شنوة باش يخرج فمك باش ما تشعلش فيك
الكل يخاف منها ويعمللها ألف حساب
نحبها برشا وخذيت منها برشا
مماتي تفهم في الاتيكات وتفهم في الدنيا
كانت تقلي بنيتي قرايتك ما تنفعك كان هي
أقرى على روحك عيش بنتي
أخرج تفرهد عيش حياتك
سافر راهو السفر باهي ويعلم
اي مماتي الزمنية فاقتلها حكاية السفر
مماتي قديدة تعرف قيمة الفرنك، تهجلت على بكري وخلالها حنيني8غشاشر باش تكبرهم وتربيهم
وعرفت قيمة السوردي
ومع هذا وين نجي مسافرة تمد وتعطيني شنو كتب من ربي وتقلي تفرهد بنتي وما تحرمش روحك
مماتي نحبوها اما على ماهي قوية حتى حد لاقلها نهار نحبك يا
أمي تشبلها شوية
مانذكرش في حياتي أمي عنقتني ولا قتلي ايجا بوسني ولا نحبك
لا مكان للمشاعر والأحاسيس رغم اني متأكدة أنهم أكثر ناس يحبوا
أمي كي نبكي تغزرلي وتقلي: علاش البكاء ما ثما شي يستحق تنكد فاها على روحك برا اغسل وجهك ويزي بلا تخلويض
عمري ما ريت أمي تبكي
لافي مناسبات زاهية متاع عرس لافي مرض قوي
في المقابل بابا يبكي
أمي زادة عمرنا ما نقولولها نحبك، رغم انها تعطي وتعطي وتعطي وبعمرها ماتقول أحيت
على ماهي قوية نخاف نقلها نحبك تمشي وتخليني
اما أنا ما نعرفش نعمل في دنيا من غير ممّاتي
حبت هي و مماتي يطلعوني قوية
اما أنا ما نجمتش
نبكي فيسع
2 commentaires:
ربي إخليهملك، حاجة وحدة إتقولهالك أمك هناني: برّة إمشي عنّقهم واتدحنس عليهم وارقد علي ركبتهم ، أتوا إتشوف الإحساس إلي باش إتحسو و ماتخافش ما يمشيوش و يخليوك.. و من بعد قلي أشنوا رد فعلهم.
@hannoun:الحكاية موش ساهلة صدقني
كل واحد فاش جاتو وانا جاتني بطول الخشم
أهوكة نستنا عيد ولا عاشوراء باش نزلق كلمة نحبك
Enregistrer un commentaire