كلوف

ربي يعطينا جار بلا وذنين وبلا عينين.
أما في الحكاية الجار هو العبد لله، الله غالب اما عينيّ يلقطو لمحمصة مالطنجرة كيف ما يقولوها، وكيف نرا ما نجمش نقعد بهتوتة لازم نعمل رياكسيون، يا حليلي أما الدنيا الكل تظهرلي معوجة ولا مركبة بالمقلوب.
سامحوني أما هاو شنو ريت ما بين البارح واليوم.

المشهد1:

مرا تتفينس في "فاست فود" جات وحطت روحها قدامي، ستنات ستنات وجاها صحن عجة مرقاز، قتلو:ايجا ايجا،أي أنت ايجا ايجا تي شبيه يتلقلق، وينو المرقاز؟ قلها لوّج في قاع الخابية توتلقاه.
قعدت تحصّر فيهم ومع اخر كعبة غرقت الفرشيتة في الخابية وقامت روحت.

المشهد2:

راجل قاعد بجنبي طلب سندويش وصحن فريت، الحق الحق حليت فمي فيه الراجل، ما يحملشي الزيوت، حاطط قداموعشرين سارفيات جوتابل ويهز في الفريت بالحارة بالحارة ويحطهم في وسط البابيي ويقعد يدلّك فيهم لين يشربلهم زيتهم، موسع بالو

المشهد3:

هذا أنا قلت فيه هوووووووووووووووووووووووووووووووه.
زحمة 8 متاع الصباح والكراهب مسرسطة، وسيدة والا أنسة(ما ثبتش )تقد في حواجبها بالملقاط، ياخي لاحشمة لا جعرة ولينا نرمال؟ يا ديني متفاهمين في كرهبتك:اما يجيشي تخرج لبركون دارك بالملابس الداخلية لا
امّالا حتى باش تنقي حواجبك في الكرهبة لا
يا حسرة على زمان بوعنبة وين كانت الطفلة تحشم باش تمشط شعرها قدام بوها...