حنين

لو كان ثمّة حاجة بديت نكرهها بديت نفدّ منها بديت نحقد عليها هي الزّواج

ها السّخطة ما كفالوش انّوبلبزلي حياتي وكرّهني في زنس المشاريع الكل

وزيد شقلب حياة الّي دايرين بي

كانت حياتي حلوّة قبل أنا و خواتي

أنا و خواتي قبل ما يعرّسو

كان عندي 2 خوات ذكورة، والحكاية هاذي كانت مساعدتني خاطرني نحب روحي لأنثى الوحيدة في وسطهم

الكبير يقرا في الخارج

وكانت عندو أفكار مضروبة وأنا نشيخ بيهم

كان يحبني نخلط عليه

نحب و ناخذ قاوري ونكمل نعيش البرّة

تفاهمنا مرّة باش ندخلو كتاب قينيس

نعرسو ونطلقو ، نعرسو ونطلقو، نعرسو ونطلقو... اييييييه حلو"ة العيشة بلاش حبل

كان يشيخ على الرأسمالية والعولمة والتطور

والمجتمع و الأديان ما يعنيولو شيئ

حجرة تو خر بينا لتالي

طز فيهم الكل

بون أنا خذيت منّو حكاية الطزّ خاطرها عجبتني

خويا لاخر فلتة و مهبول

جرّب الدنيا الكل في حياتو

هو يجرّب وأنا نتبع فيه

أول كاس شربتو من يديه

أول سيقارو

أول شيشة

أول فصعة من الدار باش نقابل الّي نحبّو

كان شريكي

يخبّي عليّ ونخبّي عليه

...

عرّسو خواتي الزوز

وما حب حدّ فيهم يطلّق

وولات عندهم مبادئ و قيم

ووليت نراهم في المواسم والأعياد الرسمية

وتوحشت حضنهم برشة برشة برشة

توحشت ندخل للغريق معاهم

توحشت نرمي روحي بين يديهم

توحشت كي نرمي يدي تجي في يديهم